الفرق بين بروفايل الشاب الخاطب والشاب المتجوز

الفرق بين بروفايل الشاب الخاطب والشاب المتجوز قال أجدادنا القدماء أن الراجل من غير ست زي البوست من غير كومنت .. والفيس بوك ده مراية الراجل والست .. و دي مش مقالة ساخرة بقدر ما هي رصد لشوية ملاحظات فعلا شوفتها لاختلافات في البروفايل الخاص بالشاب الخاطب والذي يتحول بعد ذلك - بقدر الله وحكمته - إلى شاب متزوج لا حول له ولا قوه صورة البروفايل : _____________ في فترة الخطوبة : بيحط صورته هو و خطيبته .. النظرة الحالمة و الابتسامه عريضة .. وشهم قريب قوي من بعض .. قاعدين في جنينه أو في مناسبة اجتماعية أو في مطعم شيك .. وتقريبا صورة البروفايل بتتبدل كل 5 ثواني .. ولو النت بطيء كل عشر ثواني .. بعد الجواز : أي منظر طبيعي مهديء للأعصاب .. والصورة مبتتبدلش خالص .. يعني ممكن فريندز عنده يموتوا وبروفايلاتهم تتحلل والمنظر لسه محطوط مفيش أي مشاكل .. **** أنواع البيدجات المشترك فيها : فترة الخطوبة : مفاجآت الفالانتين .. أفكار عصرية لعش الزوجية .. أفراح الفنانين والفنانات .. 50 طريقة مبتكرة تفاجيء بيها خطيبتك .. بعد الجواز : ابتسم يا ابن الكئيبة .. فضايح الفنانين والفنانات !! .. 50 طريقة مبتكرة تتخلص بيها من مراتك .. **** أغاني عمرو دياب اللي بيشيرها عالفيس : فترة الخطوبة : بيشير : خد قلبي معاه و بيشير : عودوني عليك أحبك و بيشير : قمرين دول ولا عينيك و بيشير : آه بعد الليالي و بيشير : ليلي نهاري بعد الجواز : بيشير صفحة كارهي عمرو دياب *** أنواع الموسيقى اللي بيبعتها عالفيس : ______________________________ فترة الخطوبة : موسيقى كلاسيكية متركبه على فيديو رومانسي لمشاهد من مسلسل نور ومهند موسيقى فيلم تيتانيك ده أساسي .....وإلا ميبقاش مخطوبين و موسيقى Yanny و Era بعد الجواز : تتر المال والبنون .. وليالي الحلمية .. وأغاني علي الحجار اللي اتعاون فيها مع الملحن سيد حجاب .. ***** أنواع الجروبات الدينية اللي بيخش عليها فترة الخطوبة : الجنه في بيوتنا لـ عمرو خالد أسعد الأزواج لــ مصطفى حسني بعد الجواز كتاب (لا تحزن) .. للشيخ عائض القرني وصف الجنة .. للشيخ عمر عبد الكافي اصبر ولك الحور العين ... للشيخ محمود المصري ******** أنواع الأفلام العربي اللي بيعمل لايك عليها : فترة الخطوبة : عمر وسلمى 1 عمر وسلمى 2 عمر وسلمي 3 .....اللي لسه معروض في السينما عمر وسلمي 4 .....اللي عمره ما هينزل كل أفلام مصطفى قمر ومحمد فؤاد وياسمين عبد العزيز وأحمد حلمي وأحمد عيد فترة الجواز : مبقاش يتفرج على أفلام اصلا كفاية الفيلم اللي عايش فية ****** أنواع الكومنتات : فترة الخطوبة : تلاقيه باعت كومنتات فيها قلوب كتير .. وكلها فرانكو وبالانجليزي وضحك ولعب .. بعد سنة جواز : مبقاش يعمل كومنت .. بيكتفي باللايك بعد خمس سنين جواز : بيقفل الأكونت خالص ********* الحــالة الاجتــماعية : ___________________ قبل الخطوبة : In relationship في الخطوبة نفسها Engaged بعد الجواز Hidden ************** أنواع الألبومات والصور اللي عنده : _________________________ فترة الخطوبة : Me and my fiancée ده ألبوم ليه مع خطيبته في مناسبات عديدة (500 صورة أو اكتر) .. Me with el ma2ateee3 ده ألبوم ليه مع صحابه أيام الكلية (400 صورة أو أكتر) .. فترة الجواز : مفيش ألبومات .. هي صورة واحده لوشه وعامل كروب للكرش و باقي الصور مناظر طبيعيه وصور حيوانات والف مبرووووووووك يا شباب
Sent from my BlackBerry® from Vodafone